مقال "إنها أخطر لحظة في تاريخ البشرية"
تفاصيل العمل
هذا مقال بالعامية المصرية كتبته عندما كنت انشر مقالاتي علي الفيسبوك
"إنها أخطر لحظة في تاريخ البشرية"
الجملة دي قالها شليزنجر مُستشار إدارة الرئيس الأمريكي جون كينيدي..
"لو تم القرار فإن ذلك من شأنه أن يُدمر مُعظم أنحاء العالم"
الجملة دي قالها الفيلسوف الأمريكي نعوم تشومسكي
فأي الحكاية وليه قالوا كدا؟.. وايه الي حصل فجعل العالم كله يقول إنها اخطر لحظة في تاريخ البشرية؟
الاول كدا صلي علنبي وأذكر الله.. وتعالا احكيلك ازاي كان مصير العالم كله ف لحظة من اللحظات كان بأيد "شخص واحد"
بقراره هيحدد مصير البشرية من الفناء ويغير مسار التاريخ للأبد !
الحكاية بتبدا وقت الحرب الباردة بين الاتحاد السوفيتي والولايات المتحدة الامريكية..
حصلت كذا ازمة وسط الحرب الباردة كانت أخطرها "أزمة الصواريخ الكوبية" والي ف روسيا بيقولوا عليها ازمة الكاريبي.. والي كادت الازمة دي انها تسبب حرب نووية شاملة..
اولا خليني الاول اعرفك بالحرب الباردة باختصار شديد لو انت متعرفهاش..
بعد الحرب العالمية الثانية خرج الحلفاء منتصرين وكان اكبر قويتين ف الحلفاء هم الاتحاد السوفيتي والولايات المتحدة.. والي كانت سياستهم مختلفة تماما عن بعضهم وكان فيه بينهم منافسة علي مركز قيادة العالم وكل واحد ليه منظوره من ناحية بناء العالم الجديد.. فبدأ يحصل تنافس اقتصادي وعسكري وعلمي بين الشيوعية السوفييتية والرأس مالية الأمريكية..
خلال الفترة دي بين الاربعينيات والتسعينات ظهرت الندية بين القوتين العظيمتين خلال التحالفات العسكرية والدعاية وتطوير الأسلحة والتقدم الصناعي وتطوير التكنولوجيا والتسابق الفضائي وتطوير ترسانات نووية فتاكة..
الحرب كانت عبارة عن صراع وتوتر وتنافس بدون إعلان صريح للحرب.. فظهرت عدة مصطلحات تانية زي الحروب غير المباشرة "حرب بالوكالة"
موضوع الحرب الباردة طويل جداا ودا باختصار شديد علشان منطولش ونكمل ف موضوعنا...
زي ماقولتلك حصلت ازمات كتير كانت هتؤدي لصراع مباشر بين الطرفين زي العدوان الثلاثي علي مصر وحروب العرب مع إسرائيل والي هدد الاتحاد السوفيتي ساعتها لو العدوان موقفش علي مصر الرد هيكون بقصف نووي للدول المعادية لمصر..
"ازمة الصواريخ الكوبية"
كانت المواجهه بين الاتحاد السوفيتي وامريكا حتمية تبعا لعوامل الزمن الي كانت فيه الحرب الباردة.. فكان التسليح بين الطرفين مرعب جدااا لدرجة انه حرفيا لو كانت اندلعت الحرب بينهم كانت هتبقي حرب عالمية تالتة تطال جميع أركان الأرض والدمار الي حصل في الحربين الاولي والتانية هيكون بمثابة لعب عيال بالنسبة للي كان هيحصل ساعتها بسبب التسليح النووي الي كان غير مسبوق ومرعب بالمرة..
هتقولي حرب بين دولتين بيتصارعوا علي النفوذ ازاي هتمد لحرب عالمية؟
حضرتك كل طرف فيهم كان بيمد ذراعه ف تحالفات مع دول كتيرة.. وانت لو مش متخيل حجم القوتين فتعالا اقولك الاتحاد السوفيتي كان بيتمثل ف الدول..
(روسيا - روسيا البيضاء - أوكرانيا - ملدوفا - جورجيا - أرمينيا - أذربيجان- كازخستان - أوزباكستان- تركمانستان- قيرغيزستان -طاجيكستان - إستونيا - ليتوانيا - لاتفيا)
دا غير ان الحرب هتطال اقحام جميع حلفاء الدولتين فيها..
نرجع لموضوعنا.. بما ان المواجهه بينهم كانت مسألة وقت مش اكتر.. امريكا بدأت تعمل تحسباتها ونشرت رؤوس نووية ف دول حلفاءها..
فنشرت صواريخ ثور IRBM في بريطانيا ضمن مشروع إميلي سنة 1958 ونشرت صواريخ جوبيتر IRBM في إيطاليا وتركيا سنة 1961 وكدا بقي لأمريكا مقدرة ضرب موسكو باكتر من 100 رأس نووي في حال إندلاع الحرب !
وطبعا الاتحاد السوفيتي مش هيسكت في حالة تهديد امنه القومي.. فبدأ ينشر رؤوسه النووية في دول حلفاءه برضو..
امريكا عدوتها اللدودة هي كوبا.. الدولة الصغيرة الي عاملة زي الشوكة ف حلق امريكا وقتها..
كوبا كانت حليفة للإتحاد السوفيتي.. وكان فيه عداوة كبيرة كانت هتوصل لحد الحرب كذا مرة بين امريكا وكوبا..
فبدأ الإتحاد السوفيتي ينشر صواريخه النووية علي سواحل كوبا والي يقدر من خلالها يضرب العمق الأمريكي فالادارة الامريكية لما اكتشفت ان السوفييت بيبنوا قواعد إطلاق صواريخ ف كوبا فكروا انهم يضربوا كوبا عن طريق الجو والبحر ولكن خافوا من العواقب فعملوا حظر عسكري علي كوبا وأعلنت الولايات المتحدة أنها مش هتسمح بتسليم أسلحة هجومية لكوبا وطالبت السوفيت بتفكيك أي قواعد صواريخ مبنية أو تحت الإنشاء في كوبا وإزالة جميع الأسلحة الهجومية وكانوا ساعتها متوقعين الرفض من السوفييت بشكل بديهي وكانوا قلقانين ان دا يسبب مواجهه مباشرة بين الطرفين.. خصوصا بعد رد الزعيم السوفيتي نيكيتا خروتشوف في رسالة إلى جون كنيدي رئيس امريكا وقتها بيقوله فيها
"حظر الملاحة في المياه الدولية أو المجال الجوي يشكل عملاً من أعمال العدوان تدفع البشرية إلى هاوية حرب صواريخ نووية عالمية"..
ولكن مع رفض السوفيت للمطالب الأمريكية علنيا كان فيه تحاور سري بين الطرفين لمحاولة تهدئه الأوضاع ودا لأن الطرفين مدركين تماماً انه إندلاع الحرب بينهم هيسبب دمار ملوش حصر وجميع الأطراف هتطلع خسرانه منه..
واستمرت الأزمة بينهم بالتوازي مع محاولات حلها..
وفيوم 27 اكتوبر 1962 والي نقدر نقول انه كان أخطر يوم في تاريخ البشرية والي كان كفيل بتغيير العالم للأبد..
بتبدا الحكاية لما المدمرة الأمريكية بيل (USS Beale) رصدت علي الرادارات غواصة في الأعماق مجهولة الهوية فبدأت المدمرة الأمريكية تقصف الغواصة بقنابل الأعماق والصواريخ المائيه وعلي الجانب الآخر كانت الغواصة (B-59) تابعة للجيش السوفيتي وكانت غواصة نووية !
بتحمل طوربيدات نووية مدمرة وتحت القصف الأمريكي للغواصة فقدت كل وسائل الإتصال بمركز القيادة في موسكو والغواصة بتهتز وفقدت نظام التكييف والوضع صعب.. خصوصاً ان طاقم الغواصة فكر انه تم إعلان الحرب والحرب اندلعت ودا هجوم من البحرية الأمريكية فكان الحل هو تدمير المدمرة الأمريكية الي بتهجم عليهم !
والأمر كان بأيد القادة الـ3 الكبار الي باجتماع الـ3 علي رأي الإطلاق فهيتم فوراً تدمير البحرية الأمريكية بالطوربيدات النووية والي دا بيكون شرارة حرب نووية شاملة...
القائد الأول للغواصة فالنتين سفيتسكي قال ان الحرب اندلعت وكان مصر علي تدمير البحرية الأمريكية وعملوا تصويت القادة الكبار فاتفق اتنين علي قرار الإطلاق ورفض بطل حكايتنا "فاسيلي أرخيبوف" قرار الإطلاق ودعا الي ضبط النفس في أجواء مرعبة وصعبة وطاقة الغواصة انخفضت وهم يعتبروا ف عداد الموتى.. فرفض قرار الإطلاق وأمرهم بسرعة يطلعوا علي السطح وينتظروا الأوامر من موسكو.. ودا الي حصل فعلا..
فتخيل معايا شخص ف غواصة تحت القصف والأعطال بدأت تهدد حياتهم وهو ف ايده يخلي المدمرة الأمريكية رماد ف لحظات وينقذ حياته هو والطاقم بتاعه لكنه رفض خوفا من تبعيات قراره في نشوب حرب نووية ضارية..
وعلشان تفهم حجم الدمار الي كان هيحصل وقتها تعالا احكيلك عن الـMAD.. "عقيدة الدمار المتبادل المؤكد"
ودا مصطلح صاغه الاستراتيجي الأمريكي دونالد برينان ودي استراتيجية اتخذتها الولايات المتحدة كعقيدة هتنفذها وقت نشوب حرب مع السوفيت.. وبتقضتي هجوم نووي كبير على أهداف استراتيجية ومراكز سكانية رئيسة في الاتحاد السوفيتي وحلفائه ونفذت العقيدة دي بالحرف عبر نشر الأسلحة النووية في وقت واحد على ثلاثة أنواع مختلفة من منصات الأسلحة ف أماكن متفرقة ف العالم..
وبلغ عدد الرؤوس النووية وقت الحرب الباردة في العالم لـ70,000 رأس حربي !
العقيدة دي.. مع الرقم دا هو كارثة حتمية..
انت متخيل ان السماء هتمطر علي الأرض رؤوس نووية بالعدد دا.. في عقيدة غبية بتستدعي الدمار الشامل للكرة الأرضية مش اعداء الطرفين !
بعد الازمة المرعبة دي الي كادت تؤدي لدمار العالم أدرك الكل انهم بيلعبوا بالبلدي ف ماتش خسران.. محدش هيطلع منه كسبان وهيسبب الخراب في جميع ارجاء العالم ومحدش هيطلع من الحرب دي منتصر !
بدأ وقتها الطرفين يجلسوا علي طاولة المفاوضات للبحث عن حل فعليا.. والي بعدها تم انتهاء الازمة عن طريق اتفاق بيقضتي بسحب الإتحاد السوفيتي كل اسلحته الهجومية من كوبا والولايات المتحدة تسحب كل اسلحتها الهجومية من حدود الاتحاد السوفيتي من تركيا وإيطاليا ووعدت الحكومة الأمريكية بعدم التدخل في الشئون الداخلية الكوبية واحترام حدودها وسياستها وانها هتمنع كل من يخطط لأعمال عدوانية لكوبا سواء من الأراضي الأمريكية أو أراضي دول مجاورة لكوبا.
وبكدا تم انتهاء الازمة الي كادت تتسبب ف لحظة من اللحظات في نشوب حرب نووية تأكل الاخضر واليابس وكان السبب ف ايقافها فاسيلي أرخيبوف الحكيم الي حافظ علي هدوءه في ظرف ميستدعيش الهدوء اطلاقا.. والي صرح توماس بلاتو مدير الأرشيف الأمن القومي الأمريكي أن أرخيبوف "قد أنقذ العالم"
وصرح شليزنجر مُستشار إدارة الرئيس الأمريكي جون كينيدي.. "بإنها أخطر لحظة في تاريخ البشرية"
لحظة واحدة كانت كفيلة تغير وجه العالم الي نعرفه اليوم..
لحظة واحدة كانت كفيلة بتدمير العالم وتتسبب ف ملايين القتلي دا لو متسببتش في فناء البشرية..
لحظة واحدة خلت مصير العالم بأيد شخص واحد كان ف ايده قرار تدمير العالم وقرار المحافظة علي السلام.. وهو اختار السلام..
الحكاية دي كانت فصل من فصول حماقات البشر.. ديما بقول القوة في يد عديم الكفاءة لا تثمر سوي الدمار..
كل الي حصل وكاد يتسبب ف الخراب والدم واليأس سببه سباق بين طرفين كل واحد فيهم بيسعي للسلطة والقيادة..
البشر يسعوا وراء حماقات واوهام ملهاش قيمة..
بس تفتكر كل القوة دي وصلت ف أيد البشر ازاي ؟!
هبقي احكيلك حكاية "مشبك الورق" العملية الي غيرت مجري التاريخ.. وصنعت كل دا
اكتبولي ف الكومنتات وهبقي انزل عنها ان شاء الله..
#فاسيلي_ارخيبوف #منقذ_العالم
#ازمة_الصواريخ_الكوبية #ازمة_الكاريبي
#الحرب_الباردة
#الجنوبي
#كريم_خطاب
#العزيف #ارمادا