تأملات واحد بيزرع...

تأملات واحد بيزرع

اتعلمت من الزرع إنك لو غاوي الزهور الجميلة واللي ريحتها حلوة

هتعاني معاها في الرعاية وتوفير الجو المناسب

ومراعاة مواعيد الري ... وحرفيا كدة

تحطها في عينيك واللي عايز يتأكد يسأل عن الجاردينيا ومسك الليل

أما لو انت مهمل بقى وفين وفين على ما تفتكر تروي زرعك

فمفيش أدامك غير الصبار ..

هيستحملك اوي ويعيش معاك

صابر وغلبان ومتحمل إهمالك

بس مش هتلاقي منه غير الشوك

اتعلمت من الزرع إنك على أد ما تهتم وتصبر وتتعلم المراعية

وتحاول مرة بعد مرة عشان تنجح في رعاية زرعتك

هتطرح فرحة وجمال وريحة حلوة

تنسيك كل التعب اللي تعبته والأحلى من كدة

إنك هتبقى أستاذ وكل اللي باديء بعدك هيستعجب من النتيجة اللي وصلتلها

وهيطلب منك نصايح وحلول عشان يتصلح حال زرعته ..

لما فكرت شوية لقيت الحياة كدة بالظبط ..

على أد ما تدي من وقتك واهتمامك وحبك وتصبر وتراعي وتتعلم مرة بعد مرة وتفهم طباع الناس الي في حياتك

على أد ما هتلاقي حياة حلوة وصحبة طيبة وعشرة متتقدرش بكنوز الدنيا ..

اما لو مش لاقي وقت تدي ولا مستعد تروي وتراعي

يبقى ترضى اوي بشوك الصبار ومتبصش على زرع الناس اللي تعبت وصبرت عشان يبقى في حياتها جاردينيا ومسك الليل