اتعلمت ايه من الشغل ؟

خلاصة اللي ممكن تتعلمه في شغلك يمكن يفيد حد :

١-الشغل وسيلة وليس غاية .

- خليك فاكر دايماً ان الشغل وسيلة ومصدر رزق مش غاية ، الشغل مش والدك والشركة مش والدتك ، الأساس هو إنت وأهلك وبيتك ، الناس دي بس هي اللي حتقبلك في كل حالاتك ، شغلك حيقبلك وانت ناجح بس .

٢-هذا الوقت سيمضي .

- أي ضغط في الشغل حيعدي ، أي وقت صعب حيعدي ، حاول تستمتع لو فيه وقت حلو وتتأقلم لو فيه ضغط ، و أي شخص مهما كان منصبه فهو إلى زوال ، ومش هيفضل غير دعوات الناس ليه أو عليه .

٣-من إرتضى الأجر ، فليتقن العمل .

- لو المكان اللي بتشتغل فيه مش مقدرك أو انت شايف إنه بيظلمك ، إوعى تعامله بالمثل أو تقصر في شغلك ، ولو قررت تسيب شغلك سيبه وانت في عز نشاطك ونجوميتك والناس كلها بتشهد بشطارتك ، وأوعى الشيطان يفتحلك باب " إشتغل على قد فلوسهم " ، إنت كده بتنتقم من نفسك في الدنيا و الآخرة مش بتنتقم من المكان .

٤-خذ بأيدي المستضعفين .

- لو لقيت واحد مطفي ، وكل الناس بتقطع فيه ، خليك انت الشمعه اللي بتنوره ، متعملش زيهم وتتشطر عليه ، ممكن تكون انت طوق النجاه الوحيد لشغله وبيته وصحته النفسيه .

٥-لا ترد السائل ولو بشق تمره .

- متردش أي حد طلب منك مساعده ، أو مطلبش ، ساعد باللي تقدر عليه حتى لو كان قليل ، ومتنساش الناس الفريش خد بإيديهم وعلمهم اللي اتمنيت حد يعلمهولك في يوم من الأيام ، وخد بالك ولادك النهارده حيبقوا الناس الفريش بتوع بكره وحيلاقوا برضه اللي ياخد بإيديهم .

٦-إرض بما قسمه الله لك تكن أغنى الناس .

- والرضا هنا انك تعمل كل اللي عليك وتسعى على كل باب وتتعب وفي الآخر ترضى بالنتيجه ، إوعى الشيطان يخليك تبص لرزق غيرك اللي ربنا قسمهوله في الفلوس ، ويقولك انت أحق منه ، دي مش بتاعتك دي بتاعت ربنا ولا يظلم ربك أحدا ، رزقك حتاخده في الفلوس الحلال والصحه والعيله وحب الناس وحاجات تانيه كتير مهمه .

٧-أترك أثر .

- سيب دايماً ذكرى كويسه عند كل حد اتعاملت معاه ، سواء كان زميل او عميل او حتي منافس ، ومتقللش أبداً من تأثير الكلمة الطيبة ، وخليك مؤدب حتي في النهايات ، لأن مفيش نهايات في الدنيا ، اللي بتسيبه في الشغل النهارده حتقابله بكره في شغل تاني أو في الشارع، خليك حريص إنك تقابله وراسك مرفوعه وعينك في عينه .

وأخيراً أي حد في الشغل عملت معاه حاجه كويسه في يوم من الأيام هيدعيلك ، وأي حد قصرت معاه اطلب منه يسامحك أكيد مكنتش تقصد شر.