التعاون في كتابة اسكربت وثائقي عن عائلة روتشيلد

أنا بدور على كاتب يساعدني في كتابة سكريبت فيديو وثائقي عن عائلة روتشيلد لقناتي على يوتيوب.

الموضوع اتعمل عنه فيديوهات كتير جدًا، لكن هدفي إني أقدم حاجة مختلفة فعلًا، مش مجرد تجميع معلومات أو إعادة كلام اتقال قبل كده. أنا عايز نعمل فيديو قوي لدرجة إنه يقدر يوصل لـ 5 مليون مشاهدة، وده محتاج مستوى أعلى بكتير من الكتابة التقليدية.

أنا مش بدور على حد يكتب السكريبت لوحده ويسلمهولي، لكن على شخص نشتغل مع بعض، نتناقش، ونقسم المهام بيننا، بحيث أفكاري وأسلوب السرد بتاعي يكونوا جزء أساسي من الفيديو. أنا طول الفترة اللي فاتت كنت بشتغل لوحدي، وعايز أبدأ أشتغل مع ناس تقدر تضيف للشغل حاجة حقيقية.

مهم جدًا إن يكون عندك خلفية عن الموضوع، وتعرف تفرق بين المعلومة الموثقة ونظريات المؤامرة والكلام السطحي. أي معلومة هنستخدمها لازم يكون ليها مصدر موثوق ودليل نقدر نعتمد عليه.

كمان أنا مش عايز سكريبت تحس إنه مكتوب بالذكاء الاصطناعي، أو مجرد معلومات متجمعة ورا بعض. أنا عايز كتابة فيها تفكير وتحليل، وتسلسل منطقي للأحداث، وقدرة على ربط المعلومات ببعض بطريقة تخلي المشاهد مهتم ومكمل للنهاية، حتى لو مش عنده أي خلفية عن الموضوع.

أتمنى قبل ما تقدم إنك تشوف شغلي السابق، عشان تفهم أسلوبي في الكتابة والسرد، وتعرف إذا كان مناسب ليك إننا نشتغل مع بعض ولا لأ.

أنا عندي خبرة في صناعة المحتوى، وسبق وقدمت فيديو طويل عن روكفيلر وصل لأكتر من 2.1 مليون مشاهدة، ومدته كانت 53 دقيقة!!!

دلوقتي عايز أقدم معالجة أعمق وأقوى للموضوع، وده محتاج شخص عنده فضول حقيقي، وبيفكر بشكل نقدي، ويقدر يشوف زوايا وأفكار مش واضحة لأي حد من أول نظرة.

مش شرط تكون اشتغلت مع قنوات كبيرة قبل كده، ولا يكون عندك CV مبهر. اللي يهمني فعلًا هو قدرتك على التفكير، والبحث، والتحليل، والكتابة، وإنك تكون بتحب اللي بتعمله ومستعد تبذل مجهود عشان تطلع حاجة تستحق.

**لو شايف إنك تقدر تضيف حاجة حقيقية للمشروع، ابعتلي نماذج من شغلك، ويفضل لو عندك تجربة سابقة في كتابة المحتوى الوثائقي أو البحث في المواضيع التاريخية والاقتصادية والسياسية.**