محمد ه.

معظم الناس معتقدة إن كونك يوتيوبر دا شئ سهل، وإنك بتطلع تقول كلمتين قدام الكاميرا وبعدها بترجع تنام على سريرك المفروش بالدولارات، ميعرفوش إن الموضوع أشبه بوظيفة Full time متكاملة الأركان، من تحضير سكريبت وتصوير ومونتاج وصورة مصغرة وعنوان يجذب المشاهد ووصف عشان الكلمات المفتاحية... إلخ.

تسألني أنت عرفت الكلام دا كله منين؟

أقولك عشان أنا إشتغلت بالفعل كيوتيوبر ومونتير لمدة سنتين في قناتي الخاصة وسنة كمونتير لعملاء آخرين، ومن واقع خبرتي على مدار ال3 سنين دول، أقدر أقولك إن 3 أشياء إذا إهتممت بهم بالشكل المطلوب، أضمن لك نجاح بنسبة 100% على اليوتيوب، ألا وهم كالتالي:

(الصورة المصغرة - عنوان الفيديو - الAudience retention المرتفع عن طريق المونتاج الجذاب).

وهنا بيأتي دوري يا عزيزي القارئ؛ أنا الحمدلله أقدر أساعدك في رقم 3، ألا وهو المونتاج الجذاب للفيديو بتاعك إن شاء الله..

ليه؟ لأني على مدار ال3 سنين دول وبعد صناعة أكتر من 130 فيديو على قناتي الخاصة و 120 فيديو للعملاء الآخرين.. إكتشفت إن أكتر حاجة بستمتع بيها أثناء هذه الرحلة هي عملية المونتاج..

دا غير إن أنا مُشاهد نَهِم لمنصة اليوتيوب في معظم المجالات (جيمنج - قصص - ريفيوز - تحديات - ..إلخ) لأني ببساطة أعشق هذه المنصة، فا هتلاقيني مُلِم بمعظم ستايلات المونتاج إن شاء الله.

ودا إللي هتشوفه بنفسك لو في نصيب إننا نشتغل مع بعض بإذن الله.. تأكد إن أنت في إيد أمينة ومُحبة لمجال الفيديو إيديت :)

أنا محمد من مصر، في إنتظار التعاون بيننا إللي هينقل قناتك نقلة تانية إن شاء الله.

ملحوظة: لا يتم وضع موسيقى من طرفي على الفيديوهات أثناء عملية المونتاج إبتغاء مرضاة الله..

{قُلْ لَا يَسْتَوِي الْخَبِيثُ وَالطَّيِّبُ وَلَوْ أَعْجَبَكَ كَثْرَةُ الْخَبِيثِ}