سيف الدين أ.

السلام عليكم ورحمة الله وبركاته

معاك المهندس..بص "سيف الدين" على طول، اشتغلت على مشاريع كتير في الذكاء الاصطناعي، بص عشان أفهمك وتعرف أنا بعمل إيه

باختصار، الذكاء الاصطناعي بيندرج تحتيه عددة حاجات بكذا طريقة تصنيف، يعني:

تعلم الآلة أو بيسموه ال machine learning

التعلم العميق أو بيسموه deep learning

جميل؟ جوه كل قسم عدة تفريعات، مثلًا:

تعلم الآلة أو ال machine learning بيندرج تحته regression tasks واللي فيه الموديل بيحاول يتوقع رقم، يعني إيه؟ يعني مثلًا الموديل يتوقع حالة درجة حرارة الطقس، المبيعات للشهر القادم، إلخ: يعني حاجات كتر حضرتك. في حاجة تانية بقى اسمها ال classification tasks ودي الموديل بيتوقع فيها صنف الحاجة أو الشيء اللي داخل له يعني هات شوية بيانات عن مريض ويقول لك هو عنده سكر ولا لأ، وما إلى ذلك

التعلم العميق وفي قول آخر ال deep learnimng وهو أعقد شوية من ال machine learning مش بالظبط أوي يعني تقؤيبًا تقدر تعتبره من اسمه عميق فبيحتاج عمق منك أنت كمان في التفكير وبناء النموذج وبرده بيدخل في الحاجتين اللي فاتوا اللي هما -لو أنت فاكر- ال regression و ال classification tasks بس بطريقة تانية هبقى أقول لك بعدين، بالإضافة لمجموعة من المهام المعقدة زي: اكتشاف الأشياء وتتبعها، النماذج اللغوية وأنظمة الردود الذكية، إنتاج الصوت، الصور وحاجات كتير تانية

المهم... أغلب الحاجات دي بقى أنا اشتغلتها بنفسي والحمد لله النتايج كانت كويسة جدا مش عايز أقول ممتازة مش هكدب عليك وأقول لك أن النماذج اللي عملتها مفيش زيها..لأ، تقريبًا كل نماذج الاصطناعي العالمية تهزم النماذج اللي عملتها بسهولة، لكن هنا يكمن الفارق...دايمًا النماذج اللي بعملها بتبقى تحت شعار "من الشعب للشعب" يعني مش محتاجة أجهزة خارقة زي النماذج العالمية ولا متطلبات تشغيل عالية، تقريبًا يعني أي سيرفر يقدر يشغلها على "المعالج"

زي ما تقدر تشوف كده في الملف الشخصي، ودي مش كل المشاريع اللي اشتغلت عليها بس أكتر. أقصد أقول لك إن شاء الله معاك في كل حاجة وإن شاء الله نغطي قدر كبير من متطلبات التشغيل، يعني معاك فلوس سيرفر ف يا هلا، مش معاك زيي كده فمع بعض إن شاء اله عشان نشوف إزاي ممكن النظام يشتغل بأقل التكاليف

المهم بعد كل ده والنقطة اللي ممكن تكون كنت بتدور عليها من بدري، الفلووووس!!

أيوة يعني أنت بتاخد كام يا عم؟؟!! دوشتني!! الإجابة طبعا على حسب المشروع والفلوس طبعًا شيء مهم جدًا...أماال كنا بنشتغل ليه؟! بس الأولى أنّ إن شاء الله تكون القيمة مجزية ومرضية يعني اللي في دماغك يحصل إن شاء الله بالطريقة اللي حضرتك تقولها إلا طبعًا لو المشروع كان يتطلب شيء معين خارجي أو شيء خارج عن مهاراتي الحالية، فبكل بساطة هقول لك إن شاء الله أن أنا مش بعرف أعمل الشيء ده وأني قدمت بناءً على فهمي للتفاصيل المعروضة عن المشروع، فاهمني؟

أرجو رحلة عمل ممتعة ليك وليّ وأرجو نكون أكتر من مجرد "عميل" و "مهندس ذكاء اصطناعي" أو يعني عميل بيتعامل مع سيف الدين، فاهمني

اهم حاجة بجد ومش كلام وخلاص إن شاء الله هو أنك تلاقي اللي أنت عايزه سواء عندي أو عند غيري، بس يعني هتخسر إيه لو اشتغلت معايا؟